ဖုတ်ဖရာ့ဒေသရှိ ရွေ့ပြောင်းမြန်မာအလုပ်သမားများအတွက် အခြေခံကျန်းမာရေးစောင့်ရှောက်မှုများ ‘SAW’ Mobile Medical Teamက ဆောင်ရွက်နေ

                  

               ၂၀၁၃ ခု ဒီဇင်ဘာ၁၅ ရက် တနင်္ဂနွေနေ့က ‘SAW’ Mobile Medical Team သည် မြန်မာရွှေ့ပြောင်း အလုပ်သမား များအတွက် ဖုတ်ဖရာ့ဒေသသို့ သွားရောက်ကာ အခြေခံကျန်းမာရေးစောင့်ရှောက်မှုလုပ်ငန်းများ ဆောင်ရွက်
ခဲ့ပါသည်။ မဲဆောက်မြို့က ၄၂ကီလိုမီတာအကွာတွင်ရှိသည့် The Best Friend စာသင်ကျောင်းသို့ ဦးစွာသွားရောက်ပြီး အနီးပတ်ဝန်းကျင်ကျေးရွာအချို့က လာရောက်စောင့်ဆိုင်းနေကြသည့် လူနာများနှင့် ကျောင်းသားကျောင်းသူများအား လိုအပ်သော ကျန်းမာရေးစောင့်ရှောက်မှုများ ဆောင်ရွက်ပေးခဲ့ပါသည်။    

            ထို့နောက် ပခါးမိုင်ကျေးရွာသို့ ဆက်လက်သွားရောက်ပြီး မွေးပြီး၃လခွဲအရွယ်မှစတင်ကာ ပိုလီယို အကြောသေ ရောဂါ ရရှိပြီး မသန်မစွမ်းဖြစ်နေသော ၆နှစ်ရွယ်ကလေးငယ်အား အိမ်တိုင်ရာ ရောက်သွား ရောက် ကြည့်ရှုပြီး ၄င်းအတွက် ရှေ့ဆက်ဆောင်ရွက် ပေးနိုင်သည့် လွှဲပို့ဆေးကုသမှုလုပ်ငန်းစဉ်များအား တိုင်ပင်ဆွေးနွေးညှိနှုိုင်းခဲ့ပြီး၊ အပြန်ခရီးတွင် HOPE စာသင်ကျောင်းသို့ဝင်ရောက်ကာ ကျန်းမာရေးပညာပေး လုပ်ငန်းအရပ်ရပ်အား ကျောင်းကော်မတီဝင်များနှင့် ဆွေးနွေးညှိနှိုင်းခဲ့ကြပါသည်။

              ထိုင်းနိုင်ငံ တက်ခ်ခရိုင် ဖုတ်ဖရာ့ဒေသသည် မြန်မာပြည်အနှံ့အပြားက ရွှေ့ပြောင်းရောက်ရှိ လာသော ရွှေ့ပြောင်းမြန်မာလုပ်သားအများအပြားနေထိုင်ရာဒေသဖြစ်ပြီး အဓိကအားဖြင့် စိုက်ပျိုးရေး၊ ဆောက်လုပ်ရေးနှင့် အရောင်းအ၀ယ်လုပ်ငန်းများတွင် လုပ်ကိုင်နေကြကာ စီးပွားရေးအခက်အခဲနှင့် တရားဝင် အထောက်အထား လက်ဝယ်မရှိမှုများကြောင့် အခက်အခဲအမျိုးစုံနှင့် ရင်ဆိုင်ကြုံတွေ့နေကြရပြီး အထူးသဖြင့် ဆေးရုံ ဆေးခန်းများသို့ မသွားရောက်နိုင်ခြင်းကြောင့် အခြေခံ ကျန်းမာရေးစောင့်ရှောက်မှုကိုပင် မရရှိနိုင် အောင် အခြေအနေဆိုးဝါးနေကြပါသည်။ ထို့အတွက် အမျိုးသမီးများလူမှုစောင့်ရှောက်ကူညီရေးအဖွဲ့(Social Action for Women)က ၂၀၀၀ခုကပင် စတင်ကာ Mobile Medical Team ကို ဆောင်ရွက်ခဲ့ပြီး ယခုအခါ အပတ်စဉ် တနင်္ဂနွေနေ့တိုင်း နံနက် ၈နာရီခွဲမှစတင်၍ ဒေါက်တာထင်ဇော်ဦးဆောင်တဲ့ ‘SAW’ Mobile Medical Team ဖြင့် ယင်းဖုတ်ဖရာ့ဒေသ ကျေးရွာများသို့် အလှည့်ကျ သွားရောက်ကျန်းမာရေး စောင့်ရှောက်မှု လုပ်ငန်းများ ဆောင်ရွက်လျက်ရှိပါသည်။

အောင်ထွန်းလင်း (SAW)