Friday, 28 September 2012

မြန်မာနိုင်ငံမှာ ကလေးစစ်သား အသုံးပြုမှု ရှိနေသေး

ယူကေ အခြေစိုက် NGO အဖွဲ့တစည်း တခုဖြစ်တဲ့ Child Soldiers International က မြန်မာနိုင်ငံ အပါအဝင် နိုင်ငံ တော်တော် များများမှာ ကလေးစစ်သား အသုံးပြုမှုတွေ ရှိနေသေးတဲ့ အကြောင်း နောက်ဆုံး ထုတ်ဝေတဲ့'Louder than Words'လို့ အမည်ပေးထားတဲ့ အစီရင်ခံစာ မှာ ဖော်ပြပါရှိ ပါတယ်။ ၂၀၁၀ ခုနှစ် ဇန်နဝါရီလကနေ ၂၀၁၂ ခုနှစ် ဇွန်လအထိ ၂ နှစ်ခွဲ ကာလအတွင်း မြန်မာနိုင်ငံ အပါအဝင် နိုင်ငံပေါင်း ၁၀ နိုင်ငံမှာ အသက် ၁၈ နှစ်အောက် အရွယ်တွေကို စစ်သားအဖြစ် အသုံးပြုမှုတွေ ရှိနေသေးတဲ့အကြောင်း Louder than words ဆိုတဲ့ အစီရင်ခံစာက ရေးသား ဖော်ပြထားပါတယ်။ ကလေးစစ်သား အသုံးပြုမှု အရေအတွက် ဘယ်လောက် ရှိသလဲလို့ Child Soildiers International အဖွဲ့ရဲ့ ပြောခွင့်ရသူကို မေးကြည့်တော့ အရေအတွက် အားဖြင့် အတိအကျပြောဆိုဖို့ အလွန်ခက်ခဲတဲ့ အကြောင်း၊ ဒါကလည်း သက် ဆိုင်ရာ အစိုးရက လွတ်လပ်တဲ့ စောင့်ကြည့်လေ့လာမှုတွေ လုပ်ခွင့် မပေးထား တာက အဓိက အကြောင်းအရင်း ဖြစ်ကြောင်းနဲ့ အရင်ကထက် စာရင် မြန်မာ အစိုးရ အနေနဲ့ ပိုပြီး ပူးပေါင်း ဆောင်ရွက်မှုတွေ လုပ်လာတယ်လို့ အဲဒီ ပြောခွင့်ရသူက ပြောပါတယ်။ ၁၈နှစ်အောက် အရွယ်တွေကို မြန်မာ့ တပ်မတော် ကနေ အသုံးပြုမှု ရှိနေရုံ သာ မက ပြည်တွင်းက လက်နက်ကိုင် အင်အားစုတွေ ကလည်း အလားတူ အသုံးပြမှုတွေ ရှိနေတယ်လို့ အစီရင်ခံစာမှာ ပါရှိပါတယ်။ မြန်မာ့ ဥပဒေအရ အရွယ် မရောက်သေးသူတွေကို စစ်သားအဖြစ် အသုံးပြုခွင့် မရှိတဲ့ အတွက် အရွယ်မရောက်သေးသူတွေကို စစ်သား အဖြစ် အသုံးပြုခဲ့ရင် စုဆောင်းခဲ့တဲ့ တာဝန်ရှိသူတွေကို ထိထိရောက်ရောက် အရေးယူတာမျိုး တွေကို မတွေ့ဘူးလို့ သူက ဆက်ပြီးထောက်ပြ ပြောဆို သွားပါတယ်။ ကလေးစစ်သား ပပျောက်ရေးဆိုင်ရာ ဥပဒေပြဌန်းချက် ရှိရမယ် ၊ အသက် အရွယ်နဲ့  ပတ်သက်ပြီး တိတိကျကျ စီစစ်ရမယ် ၊ တာဝန်ခံမှု၊ တာဝန် ယူမှု ရှိရပါမယ် ၊ နောက်ပြီး ကလေးစစ်သားအဖြစ် စုဆောင်းတဲ့ တာဝန်ရှိသူတွေကို ထိထိရောက်ရောက် အရေးမယူဘူးဆိုရင်တော့ ဒီကိစ္စတွေဆက်ပြီး ဖြစ်နေမယ်လို့ ပြောခွင့်ရသူက ဆိုသွားပါတယ်။ Child Soildiers International ရဲ့ ရှေးလုပ်ငန်းစဉ်တွေနဲ့ ပတ်သက်ပြီး မေးကြည့်တဲ့ အခါမှာတော့ သူတို့ရဲ့ Louder than Words အစီရင်ခံစာကို မြန်မာ အစိုးရထံ တင်ပြမှာ ဖြစ်သလို ကလေးစစ်သား ပပျောက်ရေး အတွက် သူတို့ရဲ့ အချက် ၁၀ ချက်ပါ အကြံပေးချက်တွေကို အစိုးရအနေနဲ့ လုပ်ဆောင်သွားနိုင်အောင်လည်း ပူးပေါင်း လုပ်ဆောင်သွားမှာ ဖြစ်ကြောင်း Child Soildiers International ရဲ့ ပြောခွင့်ရသူက ဘီဘီစီကို ပြောသွားပါတယ်။ By BBC Burmese

0 comments: