ငှက်ဖျားဆေးဝါးအတု သတိပေးချက် ထုတ်ပြန်

ဈေးကွက်အတွင်းမှာရှိတဲ့ ကန်ဖူး(Kangfu) တံဆိပ်ပါ ငှက်ဖျားဆေး (သောက်ဆေး) ဟာ ဆေးဝါးအာနိသင် လုံးဝမပါရှိတဲ့ ငှက်ဖျားဆေး အတုဖြစ်နေကြောင်း ဗဟိုအစားအသောက်နှင့် ဆေးဝါးကွပ်ကဲရေးဌာန အက်ဖ်ဒီအေက ယနေ့ သတိပေးချက် ထုတ်ပြန်ပါတယ်။ အက်ဖ်ဒီအေမှ ဒုတိယညွှန်ကြားရေးမှူး ဒေါက်တာထွန်းဇော်က “ငှက်ဖျားဆေးကိုစစ်ဖို့ တစ်နိုင်ငံလုံးရှိ ငှက်ဖျားဆေးတွေကို ဈေးကွက်နမူနာ ယူထားပြီး စစ်တယ်၊ နယ်ကနေစစ်ဖို့ ပို့ထားတဲ့ ငှက်ဖျားဆေးထဲမှာ ငှက်ဖျားဆေးဝါး အတုကို စစ်ဆေးတွေ့ရှိရတယ်၊ အသက်အန္တရာယ်ပေးမယ့် ငှက်ဖျားရောဂါအတွက် ဒီဆေးဝါးအတုကို သွားသောက်မိရင် မလိုလားအပ်တာတွေ ဖြစ်လာမှာ၊ ကျွန်တော်တို့အနေနဲ့ အစားအသောက် ဆေးဝါး တောက်လျှောက်စစ်နေတယ်၊ ပြည်သူအတွက် အန္တရာယ်ရှိနိုင်မယ့် ဟာတွေကို အရင်အသိပေး ထုတ်ပြန်နေပါတယ်” လို့ ပြောပါတယ်။ ဈေးကွက်နမူနာကို ဓါတ်ခွဲစစ်ဆေးချက်အရ Kangfu တံဆိပ်ပါ Tabellaechloroquiniphosphatis Tablet ဆေးဝါးမှာ ဆေးဝါးအတုဖြစ်နေကြောင်း စစ်ဆေးတွေ့ရှိရပါတယ်။ သည်ဆေးဝါးဟာ မြန်မာနိုင်ငံမှာ ဆေးဝါးမှတ်ပုံတင်ထားခြင်း မရှိသလို ဆေးဝါးအာနိသင်လည်း လုံးဝမရှိဘူးလို့ ဆိုပါတယ်။ ထိုဆေးတွင် ဘယ်နိုင်ငံက ထုတ်ထားတယ်ဆိုတဲ့ ခိုင်မာတဲ့ အထောက်အထား မတွေ့ရပေမယ့် တရုတ်ကထုတ်တဲ့ ဆေးလို့ အသိများပါတယ်။ ဆေးဝါးအတု၊ စံမညီ ဆေးဝါးနဲ့ မှတ်ပုံတင်ထားခြင်း မရှိတဲ့ ဆေးဝါးများကို တင်သွင်းဖြန့်ဖြူး ရောင်းချခြင်း လုံးဝမပြုလုပ်ဖို့ တားမြစ်ထားပါတယ်။ လိုက်နာဆောင်ရွက်ခြင်း မရှိပါက သက်ဆိုင်ရာအာဏာပိုင် အဖွဲ့အစည်းက အမျိုးသားဆေးဝါး ဥပဒေပုဒ်မ ၁၈ အရ တရားစွဲဆို အရေးယူမယ်လို့ အသိပေးထားကြောင်း ၂၀၁၂ ခုနှစ် အောက်တိုဘာ ၂၆ ရက်နေ့ထုတ် မော်ဒန် သတင်းဂျာနယ်တွင် ဖော်ပြထားပါသည်။ By Khit Lu Nge